ಬೆಂಗಳೂರು: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಇಂದು ಐಪಿಎಲ್ ಆರಂಭಕ್ಕೆ ಮುನ್ನ ಅಭಿಮಾನಿಗಳೊಂದಿಗೆ ಕೆಲವು ಕಾಲ ಕಳೆಯಲಿದೆ. ಇಂದು ಚಿನ್ನಸ್ವಾಮಿ ಮೈದಾನದಲ್ಲಿ ಆರ್ ಸಿಬಿ ಅನ್ ಬಾಕ್ಸ್ ಕಾರ್ಯಕ್ರಮ ನಡೆಯಲಿದೆ.
ಈ ಬಾರಿ ಆರ್ ಸಿಬಿ ಫ್ರಾಂಚೈಸಿ ಮತ್ತು ಅಭಿಮಾನಿಗಳಿಗೆ ಸಂಭ್ರಮಿಸಲು ಕಾರಣ ಹೆಚ್ಚಾಗಿದೆ. ಮಹಿಳೆಯರ ಪ್ರೀಮಿಯರ್ ಲೀಗ್ ನಲ್ಲಿ ಸ್ಮೃತಿ ಮಂಧಾನ ಪಡೆ ಚಾಂಪಿಯನ್ ಆಗಿರುವುದು ಆರ್ ಸಿಬಿ ಸಂಭ್ರಮ ಹೆಚ್ಚಲು ಕಾರಣವಾಗಿದೆ. ಡಬ್ಲ್ಯುಪಿಎಲ್ ಚಾಂಪಿಯನ್ನರನ್ನು ಬರಮಾಡಿಕೊಳ್ಳಲು ಚಿನ್ನಸ್ವಾಮಿ ಪ್ರೇಕ್ಷಕರು ಕಾದಿದ್ದಾರೆ.
ಸ್ಮೃತಿ ಮಂಧಾನ ಹಾಗೂ ಆರ್ ಸಿಬಿ ಮಹಿಳಾ ತಂಡಕ್ಕೆ ಇಂದು ಮೈದಾನದಲ್ಲಿ ಅಭಿನಂದನೆ ಕಾರ್ಯಕ್ರಮವಿರಲಿದೆ. ಜೊತೆಗೆ ವಿರಾಟ್ ಕೊಹ್ಲಿ, ಫಾ ಡು ಪ್ಲೆಸಿಸ್ ಸೇರಿದಂತೆ ಐಪಿಎಲ್ ತಂಡವೂ ಮೈದಾನದಲ್ಲಿರಲಿದೆ. ಇದು ಅಭಿಮಾನಿಗಳ ಪಾಲಿಗೆ ನಿಜಕ್ಕೂ ಹಬ್ಬವಾಗಲಿದೆ.
ಜೊತೆಗೆ ಅಭಿಮಾನಿಗಳ ಖುಷಿ ಹೆಚ್ಚಿಸಲು ಕನ್ನಡಿಗ ರಘು ದೀಕ್ಷಿತ್ ಸೇರಿದಂತೆ ಖ್ಯಾತ ಗಾಯಕರಿಂದ ಲೈವ್ ಶೋ ಕೂಡಾ ಇರಲಿದೆ. ಈಗಾಗಲೇ ಆರ್ ಸಿಬಿ ಅನ್ ಬಾಕ್ಸ್ ಕಾರ್ಯಕ್ರಮಕ್ಕೆ ಟಿಕೆಟ್ ಗಳು ಸೋಲ್ಡ್ ಔಟ್ ಆಗಿದ್ದು, ಅಭಿಮಾನಿಗಳಿಂದ ಮೈದಾನ ಭರ್ತಿಯಾಗಲಿದೆ.
