ಕಾಮನ್ ವೆಲ್ತ್ ಗೇಮ್ಸ್: ಚಿನ್ನ ಗೆದ್ದ ಖುಷಿಗೆ ಶರ್ಟ್, ರಾಕೆಟ್ ಫ್ಯಾನ್ಸ್ ನತ್ತ ಎಸೆದು ಸಂಭ್ರಮಿಸಿದ ಲಕ್ಷ್ಯ ಸೇನ್

ಬರ್ಮಿಂಗ್ ಹ್ಯಾಮ್: ಯಾರಿಗೂ ನಿರೀಕ್ಷಿಸದ ರೀತಿಯಲ್ಲಿ ಕಾಮನ್ ವೆಲ್ತ್ ಗೇಮ್ಸ್ ಪುರುಷರ ಬ್ಯಾಡ್ಮಿಂಟನ್ ಸಿಂಗಲ್ಸ್ ವಿಭಾಗದಲ್ಲಿ ಭಾರತದ ಯುವ ತಾರೆ ಲಕ್ಷ್ಯ ಸೇನ್ ಚಿನ್ನ ಗೆದ್ದು ಸಂಭ್ರಮಿಸಿದ್ದಾರೆ.

ಫೈನಲ್ ನಲ್ಲಿ ಮಲೇಷ್ಯಾದ ತ್ಸಿ ಯಂಗ್ ವಿರುದ್ಧ 2-1 (19-21, 21-9, 21-16) ಅಂತರದ ರೋಚಕ ಗೆಲುವು ಕಾಣುವುದರೊಂದಿಗೆ ಚಿನ್ನದ ಪದಕ ಗೆದ್ದುಕೊಂಡರು. 20 ವರ್ಷದ ಯುವ ಆಟಗಾರನಿಗೆ ಇದು ಮೊದಲ ಕಾಮನ್ ವೆಲ್ತ್ ಗೇಮ್ಸ್ ಚಿನ್ನ.

ರೋಚಕವಾಗಿ ನಡೆದ ಪಂದ್ಯದಲ್ಲಿ ಮೊದಲನೇ ಸೆಟ್ ಕಳೆದುಕೊಂಡಿದ್ದ ಲಕ್ಷ್ಯ ಉಳಿದೆರಡು ಸೆಟ್ ಗಳ ಮೂಲಕ ಕಮ್ ಬ್ಯಾಕ್ ಮಾಡಿದರು. ಒಂದು ತಿಂಗಳ ಹಿಂದಷ್ಟೇ ಲಕ್ಷ್ಯ ಭುಜದ ನೋವಿಗೊಳಗಾಗಿದ್ದರು. ಇಂದೂ ಬ್ಯಾಂಡೇಜ್ ಕಟ್ಟಿಕೊಂಡೇ ಆಡಿದ್ದರು. ಹಾಗಿದ್ದರೂ ಬಿರುಸಿನ ಹೊಡೆತಗಳ ಮೂಲಕ ಎದುರಾಳಿಯನ್ನು ಮಣಿಸಿದರು. ಗೆದ್ದ ಖುಷಿಯಲ್ಲಿ ತಮ್ಮ ರಾಕೆಟ್ ಮತ್ತು ಧರಿಸಿದ್ದ ಶರ್ಟ್ ಅಭಿಮಾನಿಗಳತ್ತೆ ಎಸೆದು ಸಂಭ್ರಮಿಸಿದರು. ಮೊದಲ ಬಾರಿಗೆ ಕಾಮನ್ ವೆಲ್ತ್ ಗೇಮ್ಸ್ ಪ್ರತಿನಿಧಿಸಿ ಚಿನ್ನ ಗೆದ್ದ ಪ್ರತಿಭೆಯ ಸಾಧನೆಯನ್ನು ದೇಶವೇ ಕೊಂಡಾಡುತ್ತಿದೆ.