ಮುಂಬೈ: ಅತ್ತ ಟೀಂ ಇಂಡಿಯಾ ಜೊತೆ ಟಿ20 ವಿಶ್ವಕಪ್ ಆಡಲು ಹಾರ್ದಿಕ್ ಪಾಂಡ್ಯ ಅಮೆರಿಕಾಗೆ ತೆರಳಿದ್ದರೆ ಇತ್ತ ಅವರ ಪತ್ನಿ ನತಾಶಾ ಮುಂಬೈನ ಹಾರ್ದಿಕ್ ನಿವಾಸದಿಂದ ಜಾಗ ಖಾಲಿ ಮಾಡಿದ್ದಾರೆ ಎಂದು ವರದಿಯಾಗುತ್ತಿದೆ.
ಹಾರ್ದಿಕ್ ಪಾಂಡ್ಯ ಮತ್ತು ನತಾಶಾ ವಿಚ್ಛೇದನಕ್ಕೊಳಗಾಗಲಿದ್ದಾರೆ ಎಂಬ ಸುದ್ದಿ ಕಳೆದ ಕೆಲವು ದಿನಗಳಿಂದ ಕೇಳಿಬರುತ್ತಿದೆ. ಇಬ್ಬರೂ ಈಗ ಜೊತೆಯಾಗಿಲ್ಲ ಎನ್ನಲಾಗಿದೆ. ಇದಕ್ಕೆ ಕಾರಣ ಇಬ್ಬರ ನಡುವಳಿಕೆ ಮತ್ತು ಸೋಷಿಯಲ್ ಮೀಡಿಯಾ ಚಟುವಟಿಕೆಗಳು.
ಮಾರ್ಚ್ 4 ರಂದು ನತಾಶಾ ಹುಟ್ಟುಹಬ್ಬಕ್ಕೆ ಪ್ರತಿವರ್ಷದಂತೆ ಹಾರ್ದಿಕ್ ಶುಭ ಕೋರಿರಲಿಲ್ಲ. ಅಲ್ಲದೆ ಇತ್ತೀಚೆಗೆ ತನ್ನ ಮತ್ತು ಹಾರ್ದಿಕ್ ಜೊತೆಗಿನ ಎಲ್ಲಾ ಫೋಟೋಗಳನ್ನು ಸೋಷಿಯಲ್ ಮೀಡಿಯಾದಿಂದ ಡಿಲೀಟ್ ಮಾಡಿದ್ದರು. ಜೊತೆಗೆ ತಮ್ಮ ಹೆಸರಿನ ಜೊತೆಗಿದ್ದ ಪಾಂಡ್ಯ ಸರ್ ನೇಮ್ ನ್ನೂ ಕಿತ್ತು ಹಾಕಿದ್ದರು.
ಇದೆಲ್ಲಾ ಬೆಳವಣಿಗೆ ಜೊತೆ ನತಾಶಾ ಮುಂಬೈನಲ್ಲಿ ದಿಶಾ ಪಟಾನಿ ಮಾಜಿ ಗೆಳೆಯ ಅಲೆಕ್ಸಾಂಡರ್ ಅಲೆಕ್ಸ್ ಜೊತೆ ಕಾಣಿಸಿಕೊಂಡಿದ್ದು ಎಲ್ಲರೂ ಹುಬ್ಬೇರುವಂತೆ ಮಾಡಿತ್ತು. ಈ ವೇಳೆ ಹಾರ್ದಿಕ್ ಜೊತೆಗಿನ ವಿರಸದ ಬಗ್ಗೆ ಪ್ರಶ್ನಿಸಿದಾಗ ನತಾಶಾ ಏನನ್ನೂ ಹೇಳಲಿಲ್ಲ. ಅಲ್ಲದೆ, ಐಪಿಎಲ್ ಮುಗಿದೊಡನೆ ಹಾರ್ದಿಕ್ ಏಕಾಂಗಿಯಾಗಿ ವಿದೇಶ ಪ್ರವಾಸ ಮಾಡಿದ್ದರು.
ಇದೆಲ್ಲದರ ಹಿನ್ನಲೆಯಲ್ಲಿ ಇಬ್ಬರೂ ದೂರವಾಗುತ್ತಿರುವುದು ಖಚಿತ ಎನ್ನಲಾಗಿದೆ. ಇದರ ನಡುವೆ ಹಾರ್ದಿಕ್ ಅಮೆರಿಕಾಗೆ ಟಿ20 ವಿಶ್ವಕಪ್ ಆಡಲು ತೆರಳಿದ ಬೆನ್ನಲ್ಲೇ ನತಾಶಾ ತಮ್ಮ ವಸ್ತುಗಳನ್ನು ಮುಂಬೈನ ಹಾರ್ದಿಕ್ ನಿವಾಸದಿಂದ ತೆರವುಗೊಳಿಸಿದ್ದಾರೆ ಎಂಬ ಸುದ್ದಿಯಿದೆ. ಈ ಎಲ್ಲಾ ಹಿನ್ನಲೆಯಲ್ಲಿ ದಂಪತಿ ದೂರವಾಗುತ್ತಿರುವುದು ಖಚಿತ ಎನ್ನಲಾಗುತ್ತಿದೆ.
