ನವದೆಹಲಿ: ನಿನ್ನೆ ಸಂಸತ್ ನಲ್ಲಿ ಪ್ರಧಾನಿ ಮೋದಿ ಭಾಷಣದ ವೇಳೆ ವಿಪಕ್ಷಗಳು ಬಾವಿಗಿಳಿದು ಪ್ರತಿಭಟನೆ ನಡೆಸುತ್ತಿದ್ದರು. ಆದರೆ ಈ ಸಂಸದರಿಗೆ ಸ್ವತಃ ಪ್ರಧಾನಿ ಮೋದಿ ನೀರು ನೀಡಿದ ವಿಡಿಯೋ ಈಗ ಎಲ್ಲೆಡೆ ವೈರಲ್ ಆಗಿದೆ.
ಲೋಕಸಭೆಯಲ್ಲಿ ನಿನ್ನೆ ಪ್ರಧಾನಿ ಮೋದಿ ರಾಷ್ಟ್ರಪತಿಗಳ ಭಾಷಣಕ್ಕೆ ವಂದನಾ ನಿರ್ಣಯ ಮಂಡಿಸುತ್ತಿದ್ದರು. ಈ ವೇಳೆ ವಿಪಕ್ಷಗಳು ಸದನದ ಬಾವಿಗಿಳಿದು ಘೋಷಣೆಗಳನ್ನು ಕೂಗಿ ಗದ್ದಲವೆಬ್ಬಿಸುತ್ತಿದ್ದರು. ತಮ್ಮ ವಿರುದ್ದವೇ ಘೋಷಣೆ ಕೂಗಿದ ವಿಪಕ್ಷ ನಾಯಕರಿಗೆ ಮೋದಿ ಸ್ವತಃ ತಾವೇ ನೀರು ಕುಡಿಸಿದ್ದಾರೆ.
ಭಾಷಣದ ನಡುವೆ ಸಹಾಯಕರಲ್ಲಿ ನೀರು ತರಲು ಹೇಳಿದ ಮೋದಿ ಒಂದು ಲೋಟ ನೀರನ್ನು ತಮ್ಮ ಆಸನದ ಕೆಳ ಭಾಗದಲ್ಲೇ ಪ್ರತಿಭಟನೆ ನಡೆಸುತ್ತಿದ್ದ ಸಂಸದರಿಗೆ ನೀರು ಬೇಕಾ ಎಂದು ಕೇಳಿದರು. ಆ ಪೈಕಿ ಒಬ್ಬರು ಬೇಡವೆಂದು ನಿರಾಕರಿಸಿದರೆ ಮತ್ತೊಬ್ಬ ಸಂಸದರು ನೀರು ಪಡೆದು ಕುಡಿದರು.
ಬಳಿಕ ಖಾಲಿ ಲೋಟವನ್ನು ಮೋದಿ ಆಸನದ ಬಳಿಯೇ ಇರಿಸಿ ಮತ್ತೆ ಮೋದಿ ವಿರುದ್ಧವೇ ಘೋಷಣೆ ಮುಂದುವರಿಸಿದರು. ಈ ವಿಡಿಯೋವನ್ನು ಹಂಚಿಕೊಂಡಿರುವ ಬಿಜೆಪಿ ನಾಯಕರು, ಬೆಂಬಲಿಗರು, ಮೋದಿಜಿ ಎಂದರೆ ಹೀಗೆ ನೋಡಿ. ತಮ್ಮ ವಿರುದ್ಧ ಘೋಷಣೆ ಕೂಗುವವರಿಗೇ ನೀರು ಕುಡಿಸುತ್ತಾರೆ ಎಂದು ತಮಾಷೆ ಮಾಡಿದ್ದಾರೆ.
